Athro Addysg Gorfforol (cyfnod mamolaeth)

Swydd athro Addysg Gorfforol (MDaPh Iechyd a Lles)

Cyfnod Mamolaeth (contract blwyddyn)

Safle Ystalyfera

Mae’r ysgol yn awyddus i benodi athro ymroddgar i swydd yn yr adran Addysg Gorfforol yn Ystalyfera ar gyfnod mamolaeth o fis Medi 2023. Rydym yn chwilio am berson blaengar, brwdfrydig, ymroddgar ac egnïol sydd â’r gallu i addysgu addysg gorfforol o fewn y Maes Iechyd a Lles. Addysgir Addysg Gorfforol fel rhan o’n cwricwlwm Iechyd a Lles, ble mae dysgwyr yn dysgu am yr ochr ffitrwydd a iechyd a lles corfforol yn ogystal â datblygu dealltwriaeth am iechyd meddwl a lles emosiynol.

Mae gan yr Adran dîm profiadol o staff, sydd yn cefnogi’i gilydd ac yn anelu am y gorau o’n dysgwyr a thanio’u brwdfrydedd yn y pynciau, ynghyd â chynorthwyo gyda’r llu o weithgareddau allgyrsiol chwaraeon mae’r ysgol yn cynnig i’n dysgwyr. Nodwedd arbennig o’r adran yw’r disgwyliadau a’r safonau cyson uchel o ran gweithgaredd allgyrsiol a chyfleoedd i ddisgyblion. Bydd yr ymgeisydd llwyddiannus yn ymuno â thîm o athrawon ymroddgar dros ben sydd yn cynnig cyfleoedd amrywiol mewn sawl camp i ddisgyblion sy’n cyflawni ar lefel uchel iawn. Yn ogystal mae’r adran yn cyfrannu at weithgaredd a blaengareddau ysgol gyfan i hyrwyddo cyswllt cynradd, bywyd iach a datblygu hyfforddwyr ifanc.

Mae Ysgol Gymraeg Ystalyfera yn ysgol 3-18 oed sydd wedi'i lleoli yng Nghwm Tawe ac mae ein harlwy addysgol yn seiliedig ar ethos bugeiliol a theuluol cryf. Mae Ysgol Gymraeg Ystalyfera yn ysgol boblogaidd a ffyniannus, mae gennym hanes ardderchog o sicrhau llwyddiant academaidd, gan ddarparu ystod eang o gyfleoedd cyfoethogi a sicrhau addysg gyffredinol ragorol. Fel Ysgol Arloesi ers 2016, rydym wedi cyd-weithio gyda Llywodraeth Cymru ar ddatblygu Cwricwlwm i Gymru, gyda’r ffocws ar ddatblygu cwricwlwm ac addysgeg er mwyn diwallu’r weledigaeth cenedlaethol. Fel rhan o brosiect Ysgolion yr 21ain Ganrif, mae’r ysgol wedi gweld cryn dipyn o fuddsoddiad yn ei hadeiladau a'i chyfleusterau; mae’r cam olaf wedi darparu neuadd ysgol newydd, ardal fwyta, ystafelloedd dosbarth addysgu, adain gelfyddydol perfformio, llain 2G a chyrtiau tenis / ardal aml-bwrpas.

Mae Ysgol Gymraeg Ystalyfera – Bro Dur wedi ymrwymo i ddiogelu a hyrwyddo lles plant a phobl ifanc a disgwylir i'w holl staff gefnogi’r ymrwymiad creiddiol hwn. Mae’r swydd hon yn amodol ar wiriad manylach y Gwasanaeth Datgelu a Gwahardd.

Os hoffech fwy o fanylion am y swydd hon ac am sgwrs anffurfiol cysylltwch â’r Pennaeth, Mrs Laurel Davies.

Proses Ymgeisio

Gellid ymgeisio am y swydd hon drwy lythyr cais yn mynegi diddordeb am ymgymryd â’r swydd yn ogystal â’r ffurflen gais atodedig. Gellir sôn am brofiad perthnasol ar gyfer y swydd hon, ynghŷd â’r weledigaeth ar sut y gellir cyfrannu ymhellach yng nghyd destun cymuned yr ysgol newydd hon. Mae’r swydd hon yn ddibynnol ar wiriad diogelu trylwyr.

Dyddiad Cau: Hanner Dydd, Dydd Mercher, Ebrill 19 2023

Dyddiad dechrau y swydd: Medi 2023