Athro/awes Cynradd

Swydd Athro Cynradd (gyda chyfle datblygiad gyrfa)

Contract Parhaol

Medi 2022

+ £2,000 at gynnal a chadw a/neu ad-leoli am ddwy flynedd

+ TLR yn dilyn hwn ar gyfer ymgeisydd addas i arwain cam cynnydd 3

Dyddiad cau 12 o’r gloch dydd Mawrth 24ain Mai

Dyma gyfle arbennig i ymuno ag ysgol sydd ar drothwy cyfnod cyffrous yn ei hanes. Ym Medi eleni, mae’r ysgol yn agor i fod yn ysgol bob oed, wrth i’n hadran gynradd groesawu ei disgyblion cyntaf.

Mae gennym dîm brwdfrydig o staff yma yng Ngwynllyw, sydd yn ymroi i gynnal y safonau uchaf o ddysgu ac addysgu a chyflawniad dysgwyr. Wrth i ni dyfu ein darpariaeth cynradd dros y blynyddoedd nesaf, chwiliwn am athro cynradd ymroddgar ac egnïol er mwyn addysgu Cymraeg a/neu Saesneg a’r Dyniaethau yn CA3 am ddwy flynedd cyn addysgu yng Ngham Cynnydd 3, gyda’r posibilrwydd o gyfrifoldeb arwain dysgwyr cam cynnydd 3.

Agorodd Ysgol Gyfun Gwynllyw fel ysgol gyfun Gymraeg gyntaf hen sir Gwent yn 1988 ac ers y cyfnod hynny, braf yw gweld addysg Gymraeg yn ffynnu yn yr ardal hon. Lleolir yr ysgol ar gyrion tref hanesyddol Pont-y-pŵl, ac yn gyfleus iawn i’r trefi mawrion, Caerdydd (tua hanner awr), Casnewydd (tua chwarter awr), yn ganolog iawn i draffyrdd yr M4 a’r M5 a phriffordd Pennau’r Cymoedd sy’n arwain at Ferthyr, Y Fenni a Henffordd. Mae’r ysgol hefyd yn gweithio’n agos gydag ysgolion uwchradd Cymraeg eraill wrth ddatblygu ein cwricwlwm newydd a chynigir amryw o gyfleoedd datblygiad proffesiynol fel rhan o hyn.

Rydym yn tyfu fel ysgol bob oed ac hefyd yn croesawu datblygiadau arloesol i’n strwythurau ysgol gyfan wrth i ni edrych tua’r dyfodol. Yn sgil hyn, cynigir ystod o gyfleodd i ddatblygu gyrfa a chymryd rhan flaenllaw yn natblygiad yr ysgol gyfan gan fodloni blaenoriaeth genedlaethol.

Bydd y prif gyfrifoldebau’n cynnwys:

• Paratoi ac addysgu gwersi iaith (Cymraeg a/neu Saesneg) a’r Dyniaethau i ddysgwyr ym mlynyddoedd 7, 8 a/neu 9.

• Cyfrannu, trwy’r adran a thu hwnt, i ddatblygu a gweithredu strategaethau ysgol gyfan

• Ymgynghori ar ddatblygiadau pellach i’r cyfnod cynradd er mwyn sicrhau’r profiadau gorau i’r dysgwyr a throsglwyddo esmwyth o un gam cynnydd i’r llall

• Monitro, tracio a gwerthuso cynnydd dysgwyr o fewn y dosbarthiadau a addysgir a chynllunio ymyraethau perthnasol i ymateb i unrhyw bryderon dan oruchwyliaeth yr arweinydd adran

• Ymchwilio a chydweithio wrth ddatblygu cwricwlwm newydd Cwricwlwm i Gymru

• Cyfrannu at waith datblygu sgiliau ar draws yr adran, e.e. Cymhwysedd digidol, datrys problemau, llythrennedd, rhifedd a chreadigrwydd

• Ymrwymo i ddatblygu cyfleoedd allgyrsiol i’n dysgwyr

Disgwylir i berson sy’n ymgeisio ar gyfer y swydd fodloni’r gofynion isod:

• Meddu ar ddealltwriaeth da o addysgeg

• Meddu ar sgiliau cyfathrebu da iawn yn y Gymraeg a’r Saesneg;

• Gallu gweithio fel rhan o dîm;

• Fod yn hyblyg o ran dosbarthiadau a phynciau dysgu (o fewn arbenigedd yr unigolyn)

• Meddu ar sgiliau TGCh da iawn;

Ystyrir ceisiadau oddi wrth athrawon uwchradd neu cynradd am y swydd hon. Croesewir ceisiadau hefyd gan athrawon o’r sector Saesneg. Darperir cefnogaeth datblygu a gloywi iaith yn ôl yr angen.

Os hoffech ymuno â ni yn Ysgol Gyfun Gwynllyw, lawrlwythwch y ffurflen gais oddi ar wefan E-teach. Os ydych am sgwrs anffurfiol cysylltwch â’r ysgol i siarad â’r Pennaeth.

Dyddiad cau ar gyfer ceisiadau: 12 o’r gloch 24/05/22

This is an advertisement for the post of a teacher in a Welsh Medium School. The ability to communicate in Welsh is essential.